WEDNESDAY

22nd Aug 2018

GET MY HOROSCOPE

app
Download
【連載:乃木坂46西野七瀨之nanase-self】-前進
25.03.2018

期盼新生活嘅時期。

七瀨邁向嘅,係點樣嘅未來?

 

#「前進」

一直都覺得,自己經常受到周邊環境嘅眷顧。
所以其餘嘅嘢,就取決於自己付出咗幾多努力。

Knit/BEAMS WOMEN澀谷 (Ray BEAMS) 

Bustier one piece/ADASTRIA (LOWRYS FARM) 

Tote bag/GYDA


一個人生活嘅時候,要特別注意窗簾

升學、升班、入職,踏入各種新環境嘅春天來臨。回想我嘅學生時代,首先諗起嘅係四月升級換班嘅事。係充滿各種機遇、認識新朋友嘅重要時期。開學一個月之後,學校會準備不同活動。當時高一去咗需要外宿嘅校外學習,高二就有BBQ大會。依家諗返,應該係因為學校想俾機會我哋識朋友所以先會搞呢啲活動(笑)。事實上,我都記得當時我的確好拼命咁想建立新嘅人際關係。讀者之中,應該有唔少人就快開始一個人生活。獨居生活經驗比較豐富嘅我,想提醒大家,千祈唔好忘記準備窗簾!我最初嚟到東京時所住嘅屋,兩面都有窗。然而,我淨係帶咗一塊窗簾,所以個時夜晚成日會驚開燈會騷擾到其他住戶。基於呢個失敗嘅經歷,所以我特別想提醒大家(笑)。

喺緊張之中察覺到自己深藏嘅想法

自從工作之後,講到一年嘅界線,比起四月,我覺得迎接新年嘅一月更加重要。令我好感激嘅係,2017年年尾,係我入乃木坂46以來最忙碌嘅時期,亦係我覺得努力完成嘅每一項工作都成為我嘅動力嘅時期。乃木坂46獲得「日本唱片大獎(輝く!日本レコード大賞)」,係另一件大事。日本唱片大獎對我哋嚟講好遙不可及,但結果能夠得到提名,仲有機會企喺舞台上,伴隨現場伴奏表演,真係令我地感到非常光榮。正式演出個陣大家都出盡全力去表演,完結後再同成員一齊不斷重覆睇,仲要一邊睇,一邊自讚:「嗯,唔錯喎!」(笑)。但係之後臨公佈得獎者嘅瞬間,我唔知點解緊張起嚟……。個刻先驚覺「會緊張其實因為期待被選上」。正當我諗緊呢樣嘢嘅時候,乃木坂46嘅名被叫到,真係嚇咗我一跳!!呢個亦成為咗我無法忘懷嘅年末回憶之一。


然後,跨年係喺「NHK紅白歌唱大賽(NHK紅白歌合戦 )」後嘅休息室裡面度過。近三年嘅除夕,我都會同其他成員圍成一個圓圈,一到12點就一齊跳起,呢個已經成為我哋嘅約定俗成嘅習慣。今次,我同Maiyan(白石麻衣)和Ikuchan(生田絵梨花)率先返到休息室,手拖手準備等埋其他成員,可能係返嚟嘅路上太擠迫,所以其他人遲遲未到。我哋諗:「唔通,今年我哋只可以三個人一齊跨年?」,正有啲焦急嘅時候,佢哋12點前順利啱啱好趕到,最終可以一齊拖住手跳起! 

新年時返咗大阪老家。我連續幾日同咗唔同嘅朋友見面,行程超緊密!喺咁短時間內同咁多朋友見面,我有試過好好編排行程,但發現真係好難,我開始理解平時經理人幫我排行程到底有幾辛苦。

迎接新一年。雖然仲未有具體嘅目標,但我感覺自己喺工作上多年來受過唔少眷顧。回想過去,我從來未試過覺得自己運氣差。所以,更重要嘅一定係,喺被需要嘅場合自己究竟可以付出幾多努力。我希望自己無論面對咩情況都可以喺當中搵到樂趣,同時向前邁進。


為配合主題,「Doiya-san」識七十二變! 

本月之nanase-sense。

想展現積極前進嘅感覺,所以我俾Doiyan-san玩佢擅長嘅滑板。我依家想推進嘅係,最近沉迷緊嘅嘅益智遊戲嘅進度!

★Doiya-san=令科學技術更進步,夢想有朝一日可以搭自己製作嘅飛船飛向宇宙。


Model/西野七瀨 Photo/田形千紘 Hair & Makeup/KITA (Nord) Stylist/松尾由美 Text/吉川由希子

Load more